Tokinao

Blog on stand by, Mitohy ny tolona

tokinao — Thu, 21 May 2009 12:49:55 +0200

Miarahaba indray ô! Elaela aho tsy nanoratra, satria talohan'ny nisamborana an'i Manandafy no nanoratako lahatsoratra farany teto amin'ny blaogy Tokinao. Atoa Manandafy, izay heveriko ho tsy manan-tsiny velively amin'ity tolona ity. Nihamafana ny toe-draharaha nanomboka teo, ny marina dia tsy menatra intsony ny hat mampiseho ny tandrony, sy ny habibiany. (iniako atao sora-majinika ny "hat" satria tsy mendrika akory ny hevitra entiny. Tokony ho nataony hoe : bat = basse autorité terroriste).

Betsaka ankehitriny ny ahiahiko manokana momba ahy, satria atahorana ankehitriny izany milaza hevitra izany ho an'ny olona ao Madagasikara sy ny mpandeha any matetika. Ny mpiblaogy dia betsaka no maneho izany tahotra iaraha-manana izany raha tsy hitanisa afa-tsy i http://njnb.wordpress.com , i http://jentilisa.blaogy.com

Na izany aza, izaho dia tsy afaka ny hitsahatra hitaky ny rariny raha mbola velona sy mahatsiaro tena, Koa mahereza ny bat raha mieritreritra hisambotra, ary mahatantesa ny valin-kitsaka, fa misy fiafarany ny zava-drehetra.

Ny tena niteraka ahiahy tamiko dia ireo :

- nahazo mailaka isan-karazany aho. Ny sasany dia mody milaza fa anti-bat hono izy ka mila fanampiana ara-bola mba hitifirana tafondro an'i Andry. "Mody" hoy aho satria azoko antoka fa mety ho mpitsikilo io ary mieritreritra fa dia mety ho azony mora fotsiny raToky. Raha ny hevitro manko, dia tsy ilàna herisetra ny fitakiana ny rariny. Hoy ny frantsay 'zay hoe : "un menteur n'est jamais ecouté même s'il dit la verité", fa hoy kosa aho hoe "raha te hikatsaka ny rariny, dia ifikiro ny fahamarinana, fa raha tsy izany dia tsy hanana ny rariny intsony ianao".

- Ny mailaka sasany kosa dia mandambolambo ery sy mangataka fihaonana maika : ao ny mody miresaka "fitiavana teny malagasy". Ity olona ity dia mody niresahako tsara mihitsy hatramin'ny farany, talohan'ny nilazany hoe : mba iangaviany hono aho hanentana olona hafa izay liana amin'ny fanandratana ny maha-Malagasy mba hiara-midinika aminay. Asa ... hatramin'ny oviana no nisy "dinika" (forum - discussion) tamin'ny mailaka llooll. Hitany eto amin'ny blaogiko angamba fa mpitolona ny namako ka dia heveriny hampifandray azy amin'ireo namako aho .

- Ao ny mody hoe vehivavy "te hianatra solfa" llooll. Ny fotoana omeny dia isaky ny alahady, ao amina tanàna kely ao Antananarivo, nefa rehefa ataoko ny fanadiadiana dia tsy avy ao Antananarivo izy no mandefa mailaka fa any Azia. Asa mba ahoana ny eritreriny mahita an'ity llooll. nanaovako fanadihadiana moa ny mailakany ka dia fantatro ankehitriny ny anarany, ny fianakaviany ary ny toerana misy azy ankehitriny.

Farany, ny anton'ny lohateny ve :

Blog on stand by : atsahatro ny resaka pôlitika eto amin'ny blaogy Tokinao.

Mitohy ny tolona : hamorona (efa namorona no marimarina kokoa) blaogy iray aho, izay tsy ametrahako sary. Ka io no hovelomiko sy hanoratako mavitrika mandra-pialan'izao bat (basse autorité terroriste) izao.

Mahereza daholo ny mpiara-mitolona rehetra.

Faminaniana avy @ Tokinao : handresy Ravalomanana!

tokinao — Thu, 16 Apr 2009 01:14:06 +0200

Mety hahataitra anareo ny teny hoe "faminaniana" : rariny raha taitra ianao satria ny mpaminany tokoa matetika no manao faminaniana. Matetika dia avy amin'ny hery miafina (Andriamanitra, sns) no nahazoana izany faminaniana izany.

Noho ireo rehetra ireo dia saika ny teny hoe "vinavina" no saika nampiasaiko, izay malefaka kokoa sy misy fisalasalana betsaka kokoa. (Raha ara-matematika dia : tombanako ho 80% ny hahatanteraka ny vinavina. fa ny faminaniana kosa : omeko 95%).

Koa noho ny fahazoako antoka amin'ny handresen-DRavalomanana dia ny teny "Faminaniana" ihany no ampiasaiko.

------------------ireo fepetra----------------

1-Handresy Ravalomanana raha am-pamendrehana ~~hatrany~~ no hitoloman'ny mpomba azy. (novonoiko ny hoe "hatrany" izay mitondra fitsaràna ny tamin'ny lasa ... satria ny faminaniako dia mahakasika ny ho avy ... manomboka anio 16 aprily 2009).

2-Handresy Ravalomanana raha toa ka tsy hiharan'ny ankasomparana izy : dia ny famonoana, fandefasana am-ponja amin'ny "tsy ara-drariny". (Misy manko ny fandefasana am-ponja amin'ny ara-drariny).

----------ny fototry ny faminaniako--------

1-rehefa dinihiko ny toetoetran'ny roa mpifanadrana ankehitriny dia hitako ho mitovy amin'ireto ohatra ireto : "be maso anaty vero" sy "kely maso anaty vato". Ny mpahay an-kifidy dia mahalala fa omby sy saka no dikan'io. Ny iray : mafonja, misoko miadana, tsy dia mitroatra loatra nefa mahery vaika, miadam-piasa nefa koa mahomby. Ny faharoa kosa : kinga sy fetsy, mailaka, fa tsy ampy hery loatra handavo ny lehibe noho izy.

2-fantatro fa mbola mitady ohatra faharoa ianao hanazavàko ny hevitro ... dia teneniko anao koa ny fampitahàna azy roa ireo ho toy ny : afon-kininina sy afon-bararata. Ny kininina dia sarotra arehitra, fa ny bararata kosa dia mora mahazo afo ary mahafinaritra ery. Azonao an-tsaina koa anefa ny faharetan'ny firehetan'ireo karazan-kazo ireo. Io fampitahàko faharoa io dia vokatry ny fandinihiko ny nitranga : ny tolona 6 volana tamin'ny 2002, sy ny tolona 3 volana monja vao tsy ela.

Maro ny zavatra hany mba "voadiniko" momba azy ireo ... fa aleo aloha hatreo. (nosoratako ihany ny hoe "voadiniko" na dia tsy tiako aza : tsy ny saina tsinona no maminany fa ny ao anaty lalina .

----------ny hevitry ny hoe "MANDRESY"--------

Ireto ny tiako tenenina amin'ny hoe mandresy RAVALOMANANA :

- na hiverina ho lasa filoha,

- na ho arahina ireo foto-kevitra najorony (tsy voatery mbola hilatsaka ho Filoha tsinona izy) : dia ny fametrahana sori-dàlana voarindra (toy ny MAP), ny ady amin'ny kolikoly (BIANCO), ny fanandratana ny maha-malagasy, sns.

- na ho resy i ANDRY (resy amim-pifidianana).

- na koa tsy sahy hiatrika fifidianana i ANDRY (ny fitsoahana an-daharana dia midika ho faharesana koa tsinona).

NB: marihiko fa ny fijanonan'ny iray amin'izy roa ireo ho mpitondra nefa tsy noho ny fifidianana dia tsy midìka ho fandresena ... ; samihafa "ny mpihazakazaka tonga voalohany amin'ny fifaninanana iray" sy ny "olontsotra ~~nomena~~ manana amboara" : Tsy izay manana amboara sy medaly akory no tompon-daka satria afaka vidiana sy angalarina raha izany monja, fa izay nihazakazaka ka tonga voalohany ihany.

Miala tsiny amintsika aho raha tsy hanokatra ny fanehoan-kevitra. Tsy afaka iadin-kevitra tsinona ny faminaniana sy tsindry mandry fa dia samy manana ny azy ny tsirairay. Raha mifanohitra amin'ny amiko ny anao dia tano, fa ny tantara no hitsara tsy ho ela.

Raha te hijery ny lahatsoratro farany (talohan'ity) ianao dia sokafy ity : Valin-tagy (lalao FANTARO NY TANINAO) izay tsy resa-pôlitika mihitsy.

Hanoratra lavalava kely aoha raToky

tokinao — Fri, 20 Mar 2009 23:11:49 +0100

Ny marimarina kokoa : tsy izaho no tena hanoratra lavalava :) fa ... (vakio fotsiny aloha e!)

Tsy dia ataoko be resaka intsony ny fahitàko ny zava-nitranga teto amin'ny firenena, fa dia mitohy ny fiainana sy ny fanarahana ny zava-misy.

Mba mahalasa saina ahy ny toeran'i lafrantsa amin'ity toe-draharaha ity! Ary mahalasa saina ahy koa ny fahanginan'ny maro manoloana ny fijerin'io firenen-dehibe io izay mitongilana be ihany (ny mpitondrany manko e! mba tsy hanosora-potaka ny vahoaka frantsay rehetra) amin'i Madagasikara. Tsy takatry ny olona ve sa dia aleony minia mikipy fotsiny izao?!!

Aleo tokoa angah zanahin'ny vazaha toy izay anjakazakàn'ny mpiray tanindrazana amin'ny tena (izay lazaina fa nataon-dRavalomanana). Koa dia ho hita eo izay ho tohiny e :).

Ny isan'ny nahatonga ahy handefa eritreritra amin'izany dia ity resaka nalefan'olona tamiko ity : mailaka azoko taman'olona izy ity ary niangaviany aho hamoaka azy [ny marimarina kokoa : niangaviany aho hanadiady ilay resaka ary avy eo hanoratra ato amin'ny blaogy, mba ho be mpamaky hono :); Hay ve mba be mpamaky ny blaogindRatoky hihihihi]. Marihiko eto koa fa tsy fantatro ny mpanoratra azy. Ity àry ilay fitarainana :

salut Tokinao,

Miarahaba anao aho ary mankasitraka ny fanehoan-kevitra ataonareo eto amin'ny sehatry ny internet. tena potika tanteraka Antananarivo ankehitriny, ... (ndlr: betsaka be ny fitantaràny ny fahasimban'Antananarivo, ka aleo nofafaiko ny ankabeazany hihihi).

Izaho manko, mpiasa amina société Frantsay, ary tsy ankasitrahan'izy ireo hatrizay ny fitondran-dRavalomanana iny. Tena faly sy nihoraka tokoa ry zareo raha vao hoe niongana Ravalomanana, dia natao makotroka ny fety. Izao manko,
tsy nandoa hetra avokoa ny ankamaroan'ny orinasa frantsay tamin'ny andron'dRatsiraka, ary tafiditra amin'izany ihany koa ny anay. Ny majorité aloha fa tsy fantatro kosa na izy rehetra aloha na tsia. Be ihany manko ny mpiasa amina
Frantsay no nanambara tamiko ihany koa fa tsy mandoa hetra ny orinasa iasany fa omena ny Deba na ny zanany mivantana ny vola. Ankehitriny, faly daholo indray izy rehetra fa hiverina indray ny tsy fandoavan-ketra. Mampalahelo ahy
ny toe-javatra, rehefa ny TIKO izany no tsy mandoa hetra dia tabatabaina fa ahoana kosa ireto orinasan'ny Frantsay ireto. Asa ianao raha nahita gazety l'expess de madagascar tamin'ity herinandro ity [ndlr: omeo ilay rohy azafady rehefa mandalo eto amin'ny blaogiko ianao :)] fa efa nisy sahady ny mpandraharaha frantsay no nahasahy nanambara fa ho tsara dia tsara ny asa fihariana eto Madagasikara... Nefa manahy aho fa io hetra io mihitsy no tena antony ilazany izany fa tsy zavatra hafa. Tsy aleo ve ny orinasa malagasy no tsy mandoa hetra toy izay orinasa frantsay rah asamy hanao ny tsy mety ihany? izay aloha lesy ry Tokinao fa dia mazotoa a! dia mba analysé-o ange ny zava-mitranga toy io dia asehoy blaogy lehiroa a! (ndlr: ny handalina aloha dia tsy dia kapoakako fa aleoko avoaka fotsiny ny resakao hihihi). Dia mazotoa Tokinao fa izaho koa hamaky ny blaoginao hatrany.

veloma!

Dia izay. Ahoana ny hevitrao momba io zava-mitranga io? ary nisy tokoa ve izany? Ny hevitra tera-bary hoy ny fitenenana e :). Saika adinoko : nogasiako daholo ny fomba fanòrany hihihi fa tsy orijinaly intsony io hehehe).

Raha ny hevitro fotsiny angah dia ny hoe : tokony hatao mazava ny fitsipi-dalao amin'ny fandoavan-ketra : rehefa tokony handoa, dia tokony handoa daholo na ny TIKO io na ny an'ny frantsay, na ny Viva na ny MBS hihihi. Ary ataoko fa tsy misy maharatsy azy raha mba amoraina ny fampiasam-bolan'ny orinasa malagasy. Mba ho tena fanjakana miahy ny vahoaka tokoa.

PS: ho an'ilay nandefa hafatra ho ahy ... mba manaova blaogy koa e :).

K'raha tsy hoe izay mahay lohan-drongony sy ...

tokinao — Thu, 19 Mar 2009 20:48:18 +0100

- ... sy manam-bola dia lasa filohan'i MADAGASIKARA 'ko! (19 martsa 2009 22ora48).

- Hisy fetrany ny asan-devoly ary tsy hilamin-tsaina ny mpanompon'i satana. (17 martsa 2009 19ora43)

Война является ускорение истории

tokinao — Thu, 12 Mar 2009 02:40:36 +0100

Eny, nahateny vazaha mihitsy RaToky noho izao zava-miseho eo amin'ny firenena izao. Tsy noforoniko anefa io lohateny io fa tenin'i Lénine "Teorisianina sosialita malaza". ( nasosoko anio 8aprily2009 : Azoko antoka fa diso tsipelina izy io satria boky amin'ny teny malagasy no nangalàko azy, ary noezahiko navadika ho teny rosiana).

Raha resahina fohy ny fankasitrahako io teorisianina malaza io, dia izao : isan'ny nanandratra avo ny sosialisma izy tany am-panombohan'ity firehan-kevitra iray ity. (izay fomba fitondrana amim-piraisankina : miasa ho an'ny tanindrazana daholo ny tsirairay, ary avy eo dia zarain'ny fanjakana ny tombony). Na dia tsy nahomby aza io petraka nataony io dia hitako ho mifono fahamboniana tanteraka. Ny tsy nampahomby azy moa (araka ny fijeriko) dia noho ny antony maro :

- alaim-panahy hanararaotra ny mpitondra,

- tsy mazoto loatra mba hivoatra ny mponina satria tsy ho azy mivantana ny tombontsoa.

- sns.

Hatrany am-boalohany anefa dia tsy ireo mihitsy no nokasain'i Lénine, fa ny mba hahavitana asa goavana (ny firaisan-kina mantsy no hery), ary ny mba hikarakaran'ny Fanjakana ny tsirairay.

Tsetsatsetsa tsy aritra ihany iny resaka "Lénine" iny. Fa hiverina amin'ilay fehezanteniny etsy amin'ny lohateny aho : rehefa nandinika ny fivoaran'ny tantaran'ny vahoaka maro maneran-tany i Lénine dia nahita fa "ny ady dia manafaingana ny tantara". (Izany hoe fahatsapana ihany no nataony fa tsy mamporisika velively ny olona hiady akory izy).

Izaho manokana dia mbola mahita fa tena marina io fehezanteny io, satria :

- raha tianao ny hampanan-javatra anao "haingana", dia mangalara, sy manaova fandrobàna. Mba tsy ahafahan'ny tompon-javatra hiteny fotsiny dia: mila matanjaka sy be sandry ianao.

- raha tianao ny ho lasa mpitondra ao anatin'ny fotoana fohy, dia mampiasà hery sy fanonganam-panjakana. Ary mba hahatonga izany hetsika izany hahomby dia entano sy fitaho ny vahoaka mba hanohana anao. Ataovy izay ahazoana ny fanohanan'ny firenena mikambana, eny fa na dia fanambaràna tsy ampiheverana aza izany.

Boribory tokoa ry 'zareo ny tany, ary na dia miova aza ny taon-jato iainana, na dia nivadibadika aza ny arivotaona maro, dia toa miova endrika fotsiny kosa ireo fomba fiainana ratsy : dia ny fomba fanaovana didin'ny be sandry, ny fomba fanararaotana, sns. Taloha manko raha mikasa hanitatra ny fanjakany ny mpanjaka iray, dia mila manafika ny foko manodidina azy. Ankehitriny kosa, raha te ho mpitondra ny olona iray, dia mila manongam-panjakana fotsiny : tsy misy foko havory sy hatambatra intsony fa tonga dia mandray vita :).

Tsy mahagaga, raha io no jerena, ny zava-misy ankehitriny ao Madagasikara. Ny mahagaga dia, ny tsy hisian'izany intsony any aoriana any : Tena ho fahagagana lehibe miposaka ao Madagasikara.

Kely fotsiny moa sisa no saika tsy anoratako ny votoatin'ity lahatsoratro ity amin'ny teny gasy. Ny tenim-pirenena iray manko dia reharehan'ny tompony. Io teny io no mampiseho fa vahoaka lehibe sy manana ny maha-izy azy ny vahoaka iray. Ankehitriny anefa dia tsapako fa resaka be fotsiny ireo heverina ho reharehan'ny Malagasy :

- ny fihavanana : resaka fotsiny io amiko, satria mbola misy ny fanavaham-poko ao Madagasikara. Disoy aho raha misy milaza ny mifanohitra amin'izany ireo mpandehandeha ao Madagasikara. Aleo koa hono very tsikalakalam-pihavanana toy izay very tsikalakalam-bola" hoy i Besapaka ao amin'ny bokin'ANDRIAMANGATAHIANA izay, satria "ny havana mandany vola"

- ny firaisan-kina : tena tsy hita taratra intsony, ankoatran'ireo mbola manao valin-tànana any ambanivohitra. Raha mba hita taratra ihany kosa, dia vao mainka ratsy satria: miray hina hiady sy hifamono fotsiny.

- ny fahaizana mandray vahiny : misy ihany izy ity ... fa ny fijeriko dia satria noho ny mampahantra ny Malagasy no antony mahasariaka azy amin'ny vahiny. Jereo ange ireny mpivaro-tena tsy mila gasy ireny e! Ny vola no tena tiana ho azo.

Aleo taperiko eo ny lisitra satria ...

te hatory aho :).